Анагаахын Шинжлэх Ухааны Үндэсний Их Сургууль

Анагаахын Шинжлэх Ухааны Үндэсний Их Сургуулийн Эм зүйн сургууль, БНХАУ-ын ӨМӨЗО-ны Тонгляао хотын Өвөр Монголын Үндэстний Их Сургуулийн хамтын ажиллагааны гэрээний хүрээнд 2025 оны 10 сарын 25-30-ны өдрүүдэд Эм зүйн сургуулийн багш, оюутнууд 10 хүний бүрэлдэхүүнтэйгээр Өвөр Монголын Үндэстний Их Сургуульд зочлов. Хамтын ажиллагааны хүрээнд зохион байгуулагдсан Монгол эмийн үйлдвэрийн дадлага нь Эм зүйн сургуулийн Эмийн технологийн тэнхимийн 2 багш, 3,4,5-р курсын оюутнуудын бүрэлдэхүүний хамтаар Өвөр Монголын Үндэстний Их Сургуулийн Монгол эм, эмнэлгийн дээд сургуулийн сургалт, судалгааны лаборатори, их сургуулийн үйл ажиллагаатай танилцаж, Монгол эм болон европ эмийн үйлдвэрлэлийн технологийн мэдлэгийг сайжруулах, оюутнуудын мэргэжлийн ур чадварыг хөгжүүлэх, хоёр сургуулийн эрдэм шинжилгээ, сургалтын хамтын ажиллагааг өргөжүүлэн, батжуулах зорилгоор зохион байгуулагдав.

Өвөр Монголын Үндэстний Их Сургуулийн Олон улсын боловсролын дээд сургуулийн дэд захирал Bai Wu Yun Tu, Монгол эм, эмнэлгийн дээд сургуулийн захирал Lashi Nam Ji La нарын хамт тус сургуулийн удирдлагууд 10 сарын 27-ны өдөр Эм зүйн сургуулийн багш, оюутнуудыг хүлээн авч, уулзалт зохион байгуулсан бөгөөд цаашдын үйл ажиллагааны талаар санал солилцов. Олон улсын боловсролын дээд сургуулийн дэд захирал Bai Wu Yun Tu сургуулийнхаа гадаад оюутан солилцооныхоо бодлого, чиглэлийг танилцуулж, АШУҮИС-тай хамтын ажиллагаагаа өргөжүүлэх хүсэлтэй байгаагаа илэрхийлэн, боловсон хүчнийг чадавхижуулах болон сургалт, судалгааны чиглэлээр хоёр сургуулийн хамтын ажиллагааг гүнзгийрүүлэн ажиллахыг онцоллоо. Хөтөлбөрийн хүрээнд багш, оюутнууд Өвөр Монголын Үндэстний Их Сургуулийн Монгол Эм, Эмнэлгийн дээд сургуулийн лабораториуд, Магистр, Докторын сургалтын лабораториуд, музей болон Олон улсын боловсролын дээд сургуулийн үйл ажилллагаа, сургалтын хөтөлбөр, гадаад оюутан элсүүлэх журам, гадаад оюутны сурах орчин, оюутны байр зэрэгтэй танилцав. Үүний зэрэгцээ Монгол эм, эмнэлгийн дээд сургуулийн хараат эмнэлгийн харьяа Монгол эмийн үйлдвэр, ӨМӨЗО-ны “Адис” ХХК-ийн Монгол эмийн үйлдвэр болон Өвөр Монголын Хүрээ хошууны Монгол эмийн үйлвэр зэрэгт тус тус дадлага хийж, туршлага хуримтлууллаа.

Оюутнуудын үйлдвэрлэлийн дадлагыг үр бүтээлтэй хэрэгжүүлэх ажиллагаанд дэмжлэг үзүүлсэн хоёр сургуулийн удирдлагуудад чин сэтгэлийн талархал илэрхийлье.

Pharmasciences

Мэдээ